Ho vulwa kiḽiniki ntswa Thengwe.

Tshiṱori nga: Silas Nduvheni. Ṱhalutshedzo nga: Khathutshelo Raliphaswa.

Kiḽiniki ntswa ya musalauno yo vulwa Thengwe Thondoni, kha vhupo ha Mutale. Kiliniki iyo yo vulwa nga Musumbuluwo wa ḽa fumi-ṱhanu Lambamai. Kiḽiniki iyi ntswa iḓo vhuyedza iḽa kiḽiniki ya kale ye ya fhaṱwa nga minwaha ya gidiḓaṱahe fuiṋa, ye yavha isa shumi zwa zwino sa izwi yovha yo no fhelelwa nga tshifhinga tshau shumiswa. Kiḽiniki iyi iḓo shuma u ḓisela zwisi zwa tsini zwa fumi-mbili nḓisedzo ya zwa mutalo. Zwisi izwi hu katelwa Bashasha, Makhwilidza, na Maheni u tou bula zwiṱuku kha zwinzhi. Zwisi izwi ndi zwine zwa wela fhasi ha vhurangaphanḓa ha Thovhele Vudzidzhena Nethengwe. Tshumelo dza kiḽiniki iyi dzi ḓo vulwa lwa awara dza fumbili-ina ḓuvha ḽiṅwe na ḽiṅwe, zwine zwa ḓo thusa vhaongiwa kha u tshimbila lwendo luṱuku u wana tshumelo dza zwa mutakalo.

Nga ḓuvha ḽa vhuṱambo hau vulwa ha kiḽiniki, Thovhele Nethengwe vho amba nga ha ḓivhazwakale ya kiḽiniki iyi. Vha livhuwa bono ḽa mune wavho munnaavhane, Thovhele Vho Mmbulungeni Nethengwe, vhe vha tenda vhabvannḓa vha ḽa Berlin vha ḓa vha vha fhaṱela kiḽiniki kha vhupo havho. Kiḽiniki iyo ya kale yo dovha hafhu ya thola muongi wau thoma kha vhupo uho, musadziavhane Vho Christinah Ravhuanzwo, nga Lambamai nga nwaha wa gidiḓaṱahe fuiṋa-raru.

“Sa vharangaphanḓa vha sialala, ndi rine vhafhaṱi vha mivhundu, ndi ngazwo ri tshi takalela u vhona hu na mveledziso kha vhupo ha mahayani, u fana nau fhaṱiwa ha kiḽiniki ya musalauno ya Thengwe. Ri takalela uri Thengwe huvhe vhupo ha mveledziso kha vhupo ha Mutale, hone ri ita khuwelelo kha vha muhasho wa pfunzo uri vha fhaṱe zwikolo zwa maimo a musalauno, zwine zwa ḓovha na zwifhaṱo zwifanaho na dzi ḽebe dza vhagudiswa na vhupo ha dzi shumiswa zwa thekheniki,” vha zwa.

Mudzulatshidulo vha komiti ya kiḽiniki ya Thengwe, Vhafunzi Vho Nkhangweleni Nenzhelele, vhari vha pfa vha tshi ḓi hudza nga kiḽiniki iyi ntswa ye ya fhaṱwa kha vhupo havho. Vho ombedzela ḽauri vhadzulapo vha fanela u ṱhogomela kiḽiniki iyi nga nḓila ya vhudele uri vha kone ui shumisa lwa tshifhinga tshilapfu.

MEC vha zwamutakalo fhano Limpopo, Dr Phophi Ramathuba, vhari kiḽiniki dza vhupo ha mahayani u fana na iyi ya Thengwe dzi ḓo thusa khau alusa tshirunzi tsha vhathu vha vhupo ha mahayani. Vhari zwa zwino ahuna muimana ane aḓo humiswa arali oḓa u bebela kha kiḽiniki iyi hone vha fanela u neiwa tshumelo i fanaho na ine ya neiwa vhafumakadzi kha dzi kiḽiniki dza ḓoroboni.  

“Ri humbela uri vhaongi vhane vha ḓovha vha khou shuma kha kiḽiniki iyi ya Thengwe vha fare vhaongiwa nga ṱhonipho, hone hu songovha na vhaongiwa vhane vha humiswa hapfi ahuna mishonga ine vha khou ṱoḓa yone,” vha engedza.

Date:29 April 2024

By: Silas Nduvheni

Read: 103