Kiḽiniki ntswa ya musalauno yo vulwa Thengwe Thondoni, kha vhupo ha Mutale. Kiliniki iyo yo vulwa nga Musumbuluwo wa ḽa fumi-ṱhanu Lambamai. Kiḽiniki iyi ntswa iḓo vhuyedza iḽa kiḽiniki ya kale ye ya fhaṱwa nga minwaha ya gidiḓaṱahe fuiṋa, ye yavha isa shumi zwa zwino sa izwi yovha yo no fhelelwa nga tshifhinga tshau shumiswa. Kiḽiniki iyi iḓo shuma u ḓisela zwisi zwa tsini zwa fumi-mbili nḓisedzo ya zwa mutalo. Zwisi izwi hu katelwa Bashasha, Makhwilidza, na Maheni u tou bula zwiṱuku kha zwinzhi. Zwisi izwi ndi zwine zwa wela fhasi ha vhurangaphanḓa ha Thovhele Vudzidzhena Nethengwe.

Muḓivhalea kha nḓowetshumo ya zwa mitambo vhe vhavha vhe mugudisi wa Venda athletics na thimu dza bola ya zwanḓa, Vho Mamba Patrick Nthangeni, vho fhira fhano shangoni vhuongeloni ha Phuluso Netcare ngei Bulugwane. Vho Nthangeni vho lovha nga ḽa fumbili-thihi nga murahu ha ulwa na vhulwadze ha tshifhinga tshilapfu, vhovha vhe na minwaha ya furathi-ṱahe. Nga tshifhinga tsha vhutshilo havho, Vho Nthangeni vho shuma sa mugudisi wa thimu dza bola ya zwanḓa dza Univen na tshikwadi tsha Tshavenda tshabola yazwanda ngau angaredza. Vhovha vhe mugudisi na kha gudedzi ḽa Finyazwanḓa, hune zwa zwino ha ḓivhea sa Vhembe FET.

Neḓorobo vha kale vha masipala wa Tshwane, Dr Murunwa Makwarela, vho fhira shangoni nga matsheloni a Ḽavhuvhili ḽa fumbili-raru Lambamai. Vho Makwarela vhevhavha vhatshidzula vhupo ha Vhembe he vha aluwa kusini kwa Tshitereke, tsini na vhuongelo ha Donald Fraser.

Khathutshelo Dzaga a bvaho Ṱhohoyanḓou Block G, o tswa mbilu dza vhanzhi nga luimbo lwawe lwe a anḓadza lune lwa vhidziwa “Muvhonetsheli”. Kha luimbo ulwo Khathutshelo o shuma na Ubber Black na Racha Kill. Khathutshelo u ḓivhiwa khwine nga dzina ḽa 'Khathu' kha nḓowetshumo ya muzika. Luimbo ulu lwa Khathu ndi lune lwa ṱutshelana khwine na nḓila ine a tshila nau imba ngayo, hune lwa ṱaluswa sa ṱhanganyelwo ya amapiano na Afro-beat.

Mukhethwa Ravhuhali (29), ane avha mulanga tshiṱitshi tsha Vhembe FM, ndi muṅwe wa vhalanga zwiṱitshi vhaṱuku kha shango ḽashu. Zworalo nga mishumo yawe u khou ḓi sikela dzina kha nḓowetshumo ya vhumbvumbvusi ha radio.

Muṅwe wa vhatambi vha mutambo wa netball u khou bvela phanḓa nau mangadza nau takalelwa nga vhathu vha kha shango ḽashu ḽa Afrika Tshipembe na vha u mona na ḽifhasi. Phophi Nematangari a bvaho kusini kwa Duthuni ndimulanga vhambi( mukaputeni) wa thimu yabola ya zwanda mbili, ya Yunivesithi ya Pretoria (Tuks) thimu yau thoma na thuimu ya lushaka ya vhaswa (Baby Proteas).

Mudzulapo, Vho Russell Ratombo vha bvaho kha kusi kwa Komati tsini nyana Vleifontein vho tshuswa nga murahu hau kwashekwanya ha nnḓu yavho, zwi tshi tevhela khuḓano nga ha vhune ha mavu e nnḓu iyo ya fhaṱiwa hone. Nnḓu iyo yo kwashiwa hu songo tevhelwa maga oṱhe au tendelwa u thutha nnḓu iyo ubva kha Vhamusanda vha muvhundu uyo.

Vhamusanda vha kusi kwa Tshidimbini, Vhamusanda Mulingoni Eric Tshivhase, vhe vhavha vha tshi ḓivhiwa khwine nga ḽa “Rambo” nga hone uvha na vhukoni kha mitambo yau fhambana, vho dzama nga Mugivhela wa ḽa fumi-na-raru Lambamai.

Vha tshikolo tsha nṱha tsha Russell Bungeni vho netshedzwa tshifhaṱo tsha saintsi tsha state-of-the-art. Tshikolo itsho tshi wanala kusini kwa Bungeni. Mushumo wa u netshedza wo farwa nga Lavhuṱanu ḽa ṱhanu Lambamai. Tshifhaṱo itsho ndi mvelelo yau shumisana ha vha muhasho wa saintsi na tshanduko (DSI), vha gudedzi ḽa Stellenbosch, tshiimiswa tsha mveledziso ya fulufulu ya lushaka ya Afrika Tshipembe (SANEDI), na vha khoro ya sialala ine ya rangiwaphanḓa nga Hosi Given Bungeni.

Musi ṅwana wa minwaha miraru atshi vhudza mmemuhulu wawe uri mme awe vho vhulawa, ahuna muthu na muthihi we a tenda zwe avha a khou amba. Ori u amba izwi a vhudziwa uri a songo tamba nga lufu sa izwi hu mafhungo mahulwane. Fhedzi nga murahu ha tshifhinga, vho ḓou wana mme a ṅwana uyo vho eḓela kha tivha ḽa malofha vho vhulawa.

Murangaphanḓa wa sialala muswa, Vhamusanda Vho Takalani Dion Tshivhase, vho ḓadza mativha a Phiphidi kha vhuṱambo he ha farwa nga Mugivhela wa ḽa rathi Lambamai.

Vhafuni vhatevheli vha muzika vha ḓiphina nga muzika wa mithethe ya furaru u sa thithiswi une wa vhidziwa “Muvango wa Vhege” nga Lavhuṱanu ḽiṅwe na ḽiṅwe kha radio ya lushaka ya Phalaphala FM. Fhedzi mbudziso ine muṅwe na muṅwe avha nayo ndi yauri naa ndi nnyi ane avha murahu ha muzika uyo? Vha nyanḓadza mafhungo ya Limpopo Mirror vho ḓou zwi sala murahu he vha wana uri ndi muvango wa Ndiafhi Nethonzhe (41) he ra mu humbela uri a kovhe nḓila yawe yau bveledza muvango uyu hone o swika hani kha nḓowetshumo ya vhumbvumbvusi.

Nga murahu ha minwaha i paḓaho furaru ho sikwa tshigwada tsha muzika wa Tshivenda wa sialala tsha Mudzinginyo Band vha kha ḓi bvela phanḓa nau avhela vhathu muzika u fushaho. Bennde iyi yo tumbuliwa nga ṅwaha wa gidiḓaṱahe fuṱahe-raru kusini kwa Duvhuledza nnḓa nyana ha Thohoyanḓou.