Mapholisa vha khou zwimana na munna we a vhulaha pholisa Tshakhuma

Tshiṱori nga: Elmon Tshikhudo.   Ṱhalutshedzo nga: Khathutshelo Raliphaswa.

Muthuntshano we wavha hone vhukati ha mapholisa na mavemu we wa itea ngei Tshakhuma wo sia vhadzulapo vha Tshakhuma vho ḓalelwa nga nyofho. Muṅwe wa mapholisa ayo, Sedzheni M Nemahadeni wa minwaha ya fuiṋa-iṋa, o ḓou thuntshiwa lu tatisaho nga tshifhinga tsha tshiwo itsho. O ḓou hwalelwa vhuongeloni ha Bulugwane nga bupho ḽiṱuku, he mashudu mavhi a fhedza ori sia shangoni nga madekwana a Lavhuṱanu. Nemahadeni ovha e muṅwe wa yunithi ya mapholisa a tshiṱitshi tsha  Levubu.

Muambeli wa mapholisa a Limpopo Brigadier Hlulani Mashaba vho amba zwauri muthuntshano wo thoma Tsianda, he vhanna vhararu vhe vhavha vhoḓi ṱama vho ṱhasela mune wa vhengele ḽa kha vhupo uho, vha mu ṱangula masheleni ane hango bulwa tshivhalo. Vho ḓou sia mune wa vhengele uyo o huvhala vha ṱuwa na tshiendedzi tshawe. “Nemahadani na mushumisani vho ḓou vhigelwa tshiwo itsho tshau ṱangula, vho ḓou vhugelwa ngahe mavemu vha shavhela hone vha vha tevhela Tshakhuma. Mavemu, vha tshi vhona mapholisa a tshi vha tevhela, vha thoma u thuntsha, he mapholisa navho vha thoma u thuntsha murahu. Nga tshifhinga tsha muthuntshano, muṅwe wa mavemu o ḓou huvhala, ngeno muṅwe wa minwaha ya furaru-mbili o farwa. Muṅwe wa mavemu o ḓou shavha ane zwa zwino vha khou zwimana nae. Munna uyo o shavhaho u ḓivhea nga ḽa Caiphus Nengwani Ndou,” vha amba.

Tshiwo itshi tsho kaidzwa na nga vhafaramikovha vha sekhithara nnzhi kha muvhundu wa Tshakhuma. Vho Rofhiwa Nyamande, tshanḓa tsha mudzulatshidulo vha tshiimiswa tsha dzangano lavhdzulapo, vhari vhadzulapo vho sala vho vhaisala nau shushea nga zwe zwa itea, zwihulu ngauri ofisiri wa vhupholisa vho lozwa vhutshilo havho zwanḓani zwa mavemu nga tshifhinga tsha mushumo. “Sa vhadzulapo, ro neta nga zwiito zwa vhugevhenga zwine zwa khou itea kha vhupo hashu. Tshiwo tshi fanaho na itshi tsho itea minwaha mivhili yo fhiraho musi mavemu vha tshi ṱangula mavhengele tserekano a Elim vhe vha gidimiswa nga mapholisa vha fhedza nga u thuntshana. Muṅwe wa mavemu o ḓou thuntshiwa ngeno muṅwe wavho o shavha. Asi kale hovha nau ṱangulwa nga masiari kha mavhengele tserekano huswa fhano. Ari tshapfa ro tsireledzea fhano. Muthu ane mapholisa vha khou zwimana nae ndi muthu ane a ḓivhea sa izwi a wa hanefha kha vhupo hashu, hone ovha oḓi ṱama. Ro neta nga vhugevhenga,” vha amba.

Vho Nyamande vhari nga murahu ha tshiwo, vho ḓou dalela miṱa ye ya vhona tshiwo itsho zwi tshi itea uvha ṋea thikhedzo. “Zwovha zwi khou shavhisa, zwihulu ngauri vhathu vhane vho kwamea ndi vhaaluwa. Manwe mafasiṱere o kwashea nga dzi gulu dze dzavha dzi khou thuntshiwa, na thannga ḽa madi, ngeno hu na vhaṅwe vhe mbondo yavho ya tshinyadzwa nga gulu. Vhadzulapo vha tshe vho shushea nga murahu hau vhona zwe zwavha zwi tshi tou fana na ḽitambwa zwi tshi itea phanḓa havho. Ro humbela mapholisa uri vha dzudzanyele vhadzulapo vho kwameaho uri vhavha thuse,” vho Nyamande vha amba.

Munna uyo o huvhalaho ane ovha e muthihi na mavemu u vhuongeloni fhasi ha u lindiwa ha mapholisa hone u ḓoḓi vhonadza khothe musi atshi lungululwa vhuongeloni. Ane anga thusa mapholisa nga u ṱalusa nau ḓivhadza vhubvo ha mufu wa livemu kana are na nḓivho nga ha hune Caiphus avha hone anga kwama muofisiri wa ṱhoḓisiso, Sgt Nyambeni Madzivhandila kha 082 3199 622 kana vha founela nomboro dzau thivhali vhugevhenga dza lushaka dza 08600 10111 kana vha isa muvhigo tshiṱitshini tsha mapholisa tsha tsini navho.

Date:10 May 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019.

Read: 304